नक्कली लाइसेन्स पेस गरेका राहत शिक्षकलाई ६ महिना कैद

२० मंसिर, काठमाडौं।

धनुषास्थित एक विद्यालयमा पढाइरहेका शिक्षक भ्रष्टाचार मुद्दामा दोषी पाइएका छन् । बिहीबार विशेष अदालतले गणेशमान चारथान नगरपालिका बरमझियाको एक विद्यालयमा पढाउने ब्रह्मदेव यादवलाई दोषी ठहर गरेको हो ।

यादवको स्थायी अध्यापन अनुमतिपत्र (टिचिङ लाइसेन्स) नक्कली भेटिएपछि ६ महिना कैद र १० हजार रुपैयाँ जरिवाना हुने सजाय सुनाइएको छ । विशेषका न्यायाधीशहरु खुसीप्रसाद थारु, रामबहादुर थापा र मुरारीबाबु श्रेष्ठको इजलासले दर्ता भएको पाँच महिनामै यस मुद्दामा ठहर हुने फैसला गरेको हो ।

अख्तियार दुरुपयोग अनुसन्धान आयोगले यसै वर्ष २५ असारमा यादवविरुद्ध नक्कली प्रमाणपत्र शीर्षकमा मुद्दा दायर गरेको थियो । उनले शिक्षक सेवा आयोगबाट जारी भएको भनिएको नक्कली निमावि लाइसेन्सका आधारमा २०६३ सालबाटै शिक्षण गराउँदै आएका थिए ।

उनले राहत कोटाबाट बरमझिया स्कुलमा पढाइरहेका थिए । यसविरुद्ध अख्तियारमा उजुरी परेपछि अख्तियारले अनुसन्धान थालेको थियो ।